Day 1&2:倉敷美觀地,岡山後樂園,岡山城

今日中午近1點機，在登機閘入閘後還要坐巴士才到5xx停機地方，當時下著毛毛雨，上巴士時每人派了一件雨褸，行上機時冇落雨，都冇用到。

哇，雲海好靚喎。

比預計到達時間還要快10分鐘。廣島機場國際線抵達大堂細得可憐。立即去Toyota租車公司攞車，跟指示行咗去國内線大堂，見到幾個租車公司counter, 原來要集合幾個客一齊搭幾分鐘van仔，到機場附近一個好大的停車場，再在那裡辦理手續攞車。

我地book P2 class 的車，型號冇得選定，竟然比咗架Porte, 車身較高，而且是一邊單門一邊雙門，唔係好方便。最麻煩係東横Inn好多電梯式停車場有高限制，未必泊到，

立即上高速公路直去倉敷，要約1小時。

Checkin完，向車站方向行，但行咗半條街，見到間日式自助餐館，好似好多款式，多數定食都係600至800yen. 又好乾淨舒服。

叫咗冷烏冬，咖哩飯等。哇，冷烏冬夠凍又彈牙，好好食。真間餐館真係所謂既CP值高，好得！

其後返回酒店，才知道原來我們買的旅遊書有介紹呢間食店。

幾分鐘行到倉敷站。舖頭都關門了，

最搶眼就是這個花之時計，但係唔work既！呢道係pokemon go 一個道場，得2個日本人係道玩。

第二日，由酒店行去美觀地，都係15分鐘。

朝早九點，大部份商店都未開，唔係好多人。

已有員工好努力修剪樹木，多得佢地，呢道先咁整齊咁靚。

其實這風景區的河流都唔係好長。

這建築物就是星買船票及集合等上船的地方。

這個小小的美觀地是倉敷市是重要的景點，每年為倉敷市帶來大量遊客收入。

好多舖頭陸續開，有岡山水蜜桃味軟雪糕，好好味，一定要試。

有少量舖頭賣新鮮水果，主要係提子及水蜜桃，價錢不便宜，而且今早才剛開始行程，決定去到岡山市先買。

上船處

逗留了2個小時，已經11點，要駕車去岡山，大約要40分鐘。但中午暴晒，臨時決定去岡山Aeon Mall行吓，食lunch先。

今日雖然係星期五，但係Aeon mall好多人，排隊商場泊車排咗半個鐘有多。要在商場買滿6000yen, 可以免費2小時泊車。

去到food court又係好多人，每間食店都要排十幾廿分鐘都攞到食物，因為咁，只能在其中一間買齊所有食物。呢個木桶魚生飯都係~800yen.木桶鰻魚飯貴D,但係d鰻魚好好食，係抵嘅。

真係好多人，隔離檯個BB好可愛。

去到岡山後樂園，中小學生免費入場，大人就可以先買共通票去埋岡山城。

岡山後樂園好寬闊，因為有類似夏祭的活動，草地上都擺放了白色波波，好似晚上會著燈。

岡山有晴天之國之稱，今日更是萬里無雲，氣溫高達36度，一定要做足防晒。

中間有個小山丘，可以環視這裡風景。

連接後樂園及岡山城是一條長長的鐵橋。

在鐵橋上的的風景係最靚，寬闊河流加上岡山城，萬里無雲的晴天，只係用普通手機影，都已經好靚。

岡山城外型是黑色，比較特別，都幾靚。

地下擺放了好多蠟燭，應該晚上點著，會好靚。

條鯉魚在陽光下閃閃生輝。

去過咁多個天守閣，呢個周邊風景係最靚嘅。

再駕車去高松，計劃中途停一停羽山展望台睇日落，點知去到已經天色黑齊。可泊幾百架車的停車場只剩下兩三架車，用僅有的光影咗呢張相，現實的環境更加黑。

呢幾日有高松夏祭活動，酒店行10分鐘的高松中央公園，有慶祝活動，好多小檔攤，好多人著和服。

其實咁熱著咁厚的和服好辛苦啫，但日本女仔都扮到好靚，咁熱又唔溶裝唔流汗，頭髮仲係set到好整齊。

行咗個圈，都係想正正經經坐係到食晚飯，去咗間地道食魚生的餐廳。餐牌全部都係日文，相都無，好彩有個待應識普通話，只有魚生片及燒烤菇，冇飯麵落肚唔係好慣。